كم عدد الأهرامات الثلاثة ؟
سؤال أكيد لما قريته قولت عليَّ إني سخيف وعلى السؤال إنه قديم. طب هسألك سؤال أقدم منه هيخليك تفتكر إني أسخف من اللي أنت متوقعه: " أين توجد أهرامات الجيزة ؟ ". طبعاً مش هتكمل قرايه، بس عايز أقول للي هيكمل قرايه بلاش يغلط فيَّ كتير، مش عشان هضايق منه، لكن عشان اللي هيغلط فيَّ دا هيبقى بيغلط في نفسه. مش عشان المبدأ اللي بيقول: "الشتيمة بتلف تلف وترجع لصاحبها". لكن علشان أنت كده بتحكم على نفسك لأنك أوقات بتتسأل وبتسأل نفسك الأسئلة اللي من النوع دا وبتجاوب غلط.
تعال أسأل نفسي واسألك معايا شوية أسئلة من نفس النوع اللي أنت بتقول عليها إنها سهلة وقديمة . وشوف هتجاوب إزاي:
س1 : أين يسكن الساكن في ستر العلي ؟
س2 : ماذا يستطيع أن يفعل القادر أن يفعل أكثر جداً مما نطلب أو نفتكر ؟
س3 : ماذا يريدنا أن نكون الذي دعانا أن نكون مشابهين صورة إبنه ؟
س4: من هو فوق الأعلى ؟
شفت إنه أوقات بنغلط في نفس الأسئلة اللي إجابتها موجودة جواها واللي عارفين إجابتها ؟. على فكرة دي مش كل الأسئلة، بس دي الأسئلة اللي إفتكرتها وأنا بارسم الأهرامات التلاتة ولقيت نفسي برسم هرم رابع كبير. قطعت الورقه بسرعه عشان حسيت إن لو حد شاف الرسمة دي هيتريق عليَّ وساعتها لو سألني:" إنت عارف فين أهرامات الجيزة دي؟" كان هيبقى عنده حق.
ليه بندور على أماكن نسكن فيها وإحنا المفروض عنوانا اللي مكتوب في البطاقة ستر العلي ؟. ليه أوقات كتيره بنشك في قدرة اللي يقدر يعمل أي حاجة . هو يقدر يعمل الهرم الرابع اللي إحنا منجرؤش نرسمه، ولما هو يعمل كده محدش يقدر يتريق ولا يفتح بُقه. لأنه دا اللي لما بيرسم بيكون ولما بيأمر بيصير . ليه هو الأعلى وبنخاف من اللي تحتيه ؟ .لو شايف حد فوقك حاسس إنه سبب خوف بص لفوق , لو لقيت اللي أعلى منه سببلك خوف أكتر أرجوك كمل وإفضل بص لفوق , لأنه كل ما بيزيد اللي يقدروا يبقوا سبب خوفك كل ما بتقرب من الأعلى اللي لما هتشوفه هتكتشف إن كل اللي تحتيه دول شغالين بالريموت كنترول اللي في إيده وهتلاقي إن اللي إنت شايفهم وحوش دول أصلاً عاملين زي العرايس وهتلاقيهم مربوطين بخيط بيحركه اللي قلوب الملوك في إيده كجداول مياه . أرجوك إتعامل مع الأسئلة اللي فاتت دي بهدؤ وجاوبها بكل بساطة زي مابتجاوب إن أهرامات الجيزة التلاته عددها تلاته وفي الجيزة .وزي مانت ماتقدرش تتجرأ وترسم هرم رابع. بلاش يجيلك الجراْة وترسم حد فوق الأعلى عشان محدش يتريق عليك . فكر في أسئلة كتير زي كده كنت بتجاوبها غلط وجاوبها المره دي صح، وعيش حسب الإجابة الطبيعية للسؤال.
وأخيراً لكل اللي مايعرفش إن الأهرامات التلاته عددها تلاتة , وإن أهرامات الجيزة دي مكانها الجيزة , أحب أجاوبله:-
ج1 : الساكن في سترالعلى يسكن في ستر العلي.
ج2: القادر أن يفعل أكثر جداً مما نطلب أو نفتكر يقدر يعمل أكثر جداً مما نطلب أو نفتكر.
ج4 : لا يوجد عالياً فوق الأعلى.
أمثلة مش محلولة :
1- إلى ماذا تعمل كل الأشياء التي تعمل معاً للخير ؟
2- الذي ينجينا عندما نتعلق به , ماذا يفعل في مشاكلنا عندما نتعلق به ؟
3- ؟إلى متى سيظل يحبنا الذي أحبنا محبة أبدية ؟
4- إلى متى يبقى أمين الذي لا يقدر أن ينكر نفسه ؟
5- ماذا يعثر على الذي لا يعثر عليه أمر ؟
ملحوظة:
1- غالباً كل الأسئلة المحلولة والأمثلة اللي مش محلولة دي بجاوبها غلط أغلب الأوقات.
2- أنا مجاوبتش على س3 اللي بيقول : "ماذا يريد من أن نكون الذي دعانا أن نكون مشابهين صورة إبنه ؟ " هو أكيد السؤال مش صعب بس الإجابة هيَّ اللي صعبة.
