التخته اللي ورا
تعريف التختة : هي الـ " ديسك " للناس اللي دخلوا مدارس لغات، لكن اللي دخل مدرسة " اللمطي الإبتدائية " زيَّ هيفهم ان هي مالهاش اسم غير "تخته". إيه رأيك في شكل الطلبة اللي في التختة الأخيرة ؟. دايماً الطلبة اللي بيتحطوا في التختة الأخيرة كل اللي حواليهم شايفينهم فشلة , ولو لقيتهم رافعين ايديهم في مرة أكيد مش عشان عايزين يجاوبوا على سؤال لكن رافعين ايديهم عشان معرفوش يجاوبوا على سؤال، وإذا كان الطلبة اللي في التختة الأولى بيطلعوا على السبورة عشان يحلوا مسائل ، فهتلاقي لو حد من بتوع التختة الأخيرة طلع على السبورة يبقى أكيد عشان يمسح السبورة، ولو في دور مهم لطالب التختة الأخيرة هتلاقي الدور دا هو توزيع "التغذية" على الفصل، ولو فيه أي نشاط إقتصادي في المدرسة من تربية خرفان او بط ووز هتلاقيهم حاطين واحد من التختة الأخيرة ياخد باله منها. هحكيلك على قصة طالب من التختة الأخيرة بس الطالب دا طلع غير كدا خااااالص
إسم الطالب : ديفيد يسى
ديفيد دا كان طالب من طلبة التختة الأخيرة اللي بيوزعوا التغذية . بس اللي بيوزع التغذية دا ربنا إختاره يكون ملك . أيوا بالظبط كده داود الملك، كان كل دور داود إنه يوزع التغذية لإخواته وإنه ياخد باله من الغنمات. ويوم ما جيه صموئيل عشان يمسح ملك من فصل الاستاذ يسى، إبتدا يسى يطلع الطلبة من الصف الأول، الطلبة المتفوقين الأقوياء الكبار الأذكياء .
بس طلبة الصف الأول دول منفعوش. فيسى قال لصموئيل إنه مفيش غير واحد. بس دا أخره يوزع أكل، ياخد باله من خرفان يشتريلك طلبات لكن مش ملك، بس داود اللي في التخته الأخيرة دا هو اللي ربنا إختاره ملك على كل إسرائيل.
لو الناس حطاك في التخته الأخيرة وشايفينك فاشل ومش مفيد وأخرك تعمل حاجات صغيرة
أحب أقولك خبر يفرحك :مدير مدرستنا بيختار الناس اللي في التختة الأخيرة الضعفاء الفقرا الجهلة عشان يستخدمهم
إختار الله اللي في التخته الأخيرة عشان يخزي بيهم الشطار اللي في التخته الأولى " 1كو 1 : 27 "
هيجي اليوم اللي ربنا هيستخدمك فيه عشان تعمل أعمال عظيمة , بس لحد مايجي اليوم دا إشتغل بأمانة في الحاجات الصغيرة . إمسح السبورة كويس، مترفضش توزع الأكل، خد بالك من الخرفان الصغيرة.
معنديش كلام كتير بس دا اللي ربنا شجعني بيه وانا قاعد في التخته الأخيرة وحسيت بالفشل. بس لقيت على التخته دي طلبه أقدم مني مشغبطين على التخته وكاتبن أساميهم: ديفيد يسى، يوسف يعقوب، بطرس، جدعون يوآش، متى العشار .وناس كتير نعرف عنهم إنهم كبار و عظماء ومستخدمين بس مكنتش واخد بالي إنهم متخرجين من التختة الأخيرة بتاعت مدرسة اللمطي الإبتدائية.
مدحت عيد
واحد من التختة اللي ورا
عنبر 11
عنبر لو بصيت على الناس اللي جواه ممكن تسميه عنبر المجانيين زي ما ناس كتير سموه , تعال احكيلك عن عينه من الناس اللي في العنبر دا :
1-
راجل مسافر بالعربية وقفته لجنه في الطريق:
الظابط سأله بكل أدب : " مسافر على فين يا استاذ؟
رد عليه قاله : ماعرفش بس انا رايح مكان رائع جداً
2-
واحدة ست عجوزة في محل ملابس أطفال بتشتري لبس لنونو:
سألتها اللي شغالة في المحل : " هو حضرتك جايباه لحد من أولادك ولا اولاد ولادك؟
ردت عليها وقالتلها : "دا لابني اللي لسه هخلفه"
3-
طفل صغير معاه نبله وكام زلطه:
بيسألوه إصحابه : " إنت رايح تصطاد فين ما تصطاد معانا؟"
رد عليهم قالهم: "انا مش رايح اصطاد عصافير انا رايح اقتل عدونا الجبار"
4-
راجل عجوز راح يعقد صفقة خشب كبيره جداً:
ولما التاجر قاله: " إنت عايز كل الخشب دا ليه, انته هتبني شركة كبيرة ولا هتصدر الخشب دا بره ؟"
رد عليه وقاله: "انا بابني سفينة كبيرة عشان في طوفان كبير جاي"
5-
واحد بيطحن قمح راح يشتري تلتميت جرة:
الراجل البياع قاله: " ياعم القمح بيتحط ف شكارة مش في جرة, ولا عشان هتهربهم ؟ قاله: " لأ, اصل انا هحط فيهم مصابيح عشان ناوي احارب بيهم "
6-
حفيد الرئيس راح السجل المدني عشان يغير بياناته:
فالموظف قاله : " مش عاجبك اسمك يا باشا تحب نغيرهولك ؟"
قاله: "لأ , انا مش عاجبني إني ابقى ابن بنت رئيس الجمهورية"
وناس كتير ف عنبر 11 ماينفعش اقولهم كلهم انا قولتلك عينه منهم .الناس حكموا على اللي ف العنبر دا انهم مجانيين بس في الحقيقة اللي الناس بتسميه جنان الكتاب قال عنه ايمان .تخيل لو سمعوا لكلام الناس , هل كانوا وصلوا للي صدقوه واللي حسبوه؟
ابراهيم وسارة وداود ونوح وجدعون وموسى وناس كتير الناس حطوهم ف عنبر 11 عنبر المجانيين , لكن الكتاب حطهم في عبرانيين 11 عنبر الايمان . لو عندك حلم إيمان والناس شايفاه جنان وحاسس انهم هيحطوك ف عنبر 11 يبقى بجد يا بختك عشان اللي بيدخل العنبر دا بيطلع على عنبر الايمان عدل . أرجوك إرجع صدق في اللي مش متشاف واللي ربنا عايزه واللي الناس شايفاه مستحيل واللي ضد الطبيعة وضد سنك وامكانياتك واتنازل عشان تحقق حلمك . حتى لو فضلت طول عمرك بتعمل شغلك في عنبر 11 , زي ما فيه ناس دخلت عنبر الايمان وهي عايشه, فيه ناس مانالتش المواعيد بس برضه اتحطوا في عنبر الايمان بعد ماماتوا.
ملحوظة :
كبيرك وسيدك حطوه في عنبر 11 ومش أي ناس, دول قرايبه وقالوا عليه إنه " مختل " انا بقولك نفس الكلمة اللي موجودة في مرقس 21:3 فسيبك من كلام الناس ولو قالوا عنك مختل يبقى يابختك
قائمة الراغبين في الدخول لعنبر11 :
******- medhat ead
انا مش عارف هبقى رقم كام في الكشف بس انا متأكد اني مش أول واحد عشان الكشف دا من ايام هابيل " عبرانيين 4:11 " ومتأكد إن في ناس كتير بعدي عشان القايمة متنفعش تكمل من غيرك " عبرانين 40:11 " تيجي تحط إسمك معايا في الكشف ؟؟ وتاخد رقم ****** ؟؟ ولو انت في الكشف دا اصلاً باشجعك متفشلش لكن بالعكس كمل و شجع كل اللي خايفين ياخدوا الخطوة دي ويتكتب إسمهم . سلااام واقابلكوا في عنبر 11 عنبر الإيمان.
