Pages

التخته اللي ورا

التخته اللي ورا


تعريف التختة : هي الـ " ديسك " للناس اللي دخلوا مدارس لغات، لكن اللي دخل مدرسة " اللمطي الإبتدائية " زيَّ هيفهم ان هي مالهاش اسم غير "تخته". إيه رأيك في شكل الطلبة اللي في التختة الأخيرة ؟. دايماً الطلبة اللي بيتحطوا في التختة الأخيرة كل اللي حواليهم شايفينهم فشلة , ولو لقيتهم رافعين ايديهم في مرة أكيد مش عشان عايزين يجاوبوا على سؤال لكن رافعين ايديهم عشان معرفوش يجاوبوا على سؤال، وإذا كان الطلبة اللي في التختة الأولى بيطلعوا على السبورة عشان يحلوا مسائل ، فهتلاقي لو حد من بتوع التختة الأخيرة طلع على السبورة يبقى أكيد عشان يمسح السبورة، ولو في دور مهم لطالب التختة الأخيرة هتلاقي الدور دا هو توزيع "التغذية" على الفصل، ولو فيه أي نشاط إقتصادي في المدرسة من تربية خرفان او بط ووز هتلاقيهم حاطين واحد من التختة الأخيرة ياخد باله منها. هحكيلك على قصة طالب من التختة الأخيرة بس الطالب دا طلع غير كدا خااااالص
إسم الطالب : ديفيد يسى
ديفيد دا كان طالب من طلبة التختة الأخيرة اللي بيوزعوا التغذية . بس اللي بيوزع التغذية دا ربنا إختاره يكون ملك . أيوا بالظبط كده داود الملك، كان كل دور داود إنه يوزع التغذية لإخواته وإنه ياخد باله من الغنمات. ويوم ما جيه صموئيل عشان يمسح ملك من فصل الاستاذ يسى، إبتدا يسى يطلع الطلبة من الصف الأول، الطلبة المتفوقين الأقوياء الكبار الأذكياء .
بس طلبة الصف الأول دول منفعوش. فيسى قال لصموئيل إنه مفيش غير واحد. بس دا أخره يوزع أكل، ياخد باله من خرفان يشتريلك طلبات لكن مش ملك، بس داود اللي في التخته الأخيرة دا هو اللي ربنا إختاره ملك على كل إسرائيل.
 لو الناس حطاك في التخته الأخيرة وشايفينك فاشل ومش مفيد وأخرك تعمل حاجات صغيرة
أحب أقولك خبر يفرحك :مدير مدرستنا بيختار الناس اللي في التختة الأخيرة الضعفاء الفقرا الجهلة عشان يستخدمهم
إختار الله اللي في التخته الأخيرة عشان يخزي بيهم الشطار اللي في التخته الأولى " 1كو 1 : 27 "
هيجي اليوم اللي ربنا هيستخدمك فيه عشان تعمل أعمال عظيمة , بس لحد مايجي اليوم دا إشتغل بأمانة في الحاجات الصغيرة . إمسح السبورة كويس، مترفضش توزع الأكل، خد بالك من الخرفان الصغيرة.
معنديش كلام كتير بس دا اللي ربنا شجعني بيه وانا قاعد في التخته الأخيرة وحسيت بالفشل. بس لقيت على التخته دي طلبه أقدم مني مشغبطين على التخته وكاتبن أساميهم: ديفيد يسى، يوسف يعقوب، بطرس، جدعون يوآش، متى العشار .وناس كتير نعرف عنهم  إنهم كبار و عظماء ومستخدمين بس مكنتش واخد بالي إنهم متخرجين من التختة الأخيرة بتاعت مدرسة اللمطي الإبتدائية.



مدحت عيد
واحد من التختة اللي ورا





No comments:

Post a Comment